Kuvend i suksesshëm pune në Mitrovicë, Kuvend zgjedhor në Shtime
Prishtinë, 25.04.2017
SBASHK-u është duke e realizuar me përpikëri agjendën e takimeve me mësimdhënës nëpër komunat e Kosovës e po ashtu është duke kryer me përpikëri agjendat e zgjedhjeve nëpër shoqata sindikale e në nivele komunale. Në kuadër të këtyre aktiviteteve në Mitrovicë është mbajtur Kuvend i suksesshëm pune i SAF e SAM të kësaj komune. Kryetarët e të gjitha shoqatave sindikale të shkollave fillore e të mesme bashkë me kolegët e tyre nga çerdhet ishin pjesë aktive e këtij takimi. Në fillimet e punimeve të këtij Kuvendi, kryetarja Vjollca Shala ka përshëndetur kryetarin SBASHK-ut, Rrahman Jasharaj dhe menaxherin për financa e administratë dhe këshilltar për organizim të brendshëm Ymer Ymeri. Pas kësaj kryetarja Shala ka bërë një pasqyrim të aktiviteteve të shumta që janë zhvilluar në këtë Komunë.
Kryetari i SBASHK-u, Rrahman Jasharaj anëtarëve të Kuvendit të SAF e SAM të Mitrovicës u ka sjellë detaje nga Kontrata e re e Arsimit të Kosovës, që është nënshkruar nga MASHT dhe SBASHK e pastaj edhe u është përgjigjur shumë pyetjeve që kishin të bënin me përmbajtjen e Kontratës së re, kurse menaxheri për financa e administratë dhe këshilltar për organizim të brendshëm Ymer Ymeri, është përgjigjur në pyetjet që kishin të bënin me Ligjin për statusin e punëtorëve të arsimit shqip të Republikës së Kosovës për vitet e 90-ta. Po ashtu ai është përgjigjur edhe në pyetje konkrete që kishin të bënin me raste nga komuna e Mitrovicës. Ajo që vlen të veçohet në këtë komunë është se koleget sindikaliste duke ndjekur shembullin e mirë të kryetares së tyre Vjollca Shala janë duke shtuar angazhimet dhe duke marrë përgjegjësitë në udhëheqjen e shoqatave sindikale. Për këtë dëshmon fakti se më shumë se gjysma e anëtarëve të Kuvendit të SAF e SAM janë femra sindikaliste.
Derisa në Mitrovicë Kuvendi ishte i punës, në Shtime është mbajtur Kuvend zgjedhor i SAF e SAM për këtë Komunë. Punimet e këtij Kuvendi i ka përshëndetur nënkryetari i SBASHK-ut ,Rexhep Sadiku , i cili edhe ka kujtuar angazhimet, sfidat dhe arritjet e SBASHK-ut.
Kryetari i SAF e SAM për këtë Komunë, Xhavit Rexhaj ka prezantuar para anëtarëve të Kuvendit raportin e punës dhe raportin financiar për 4 vite. Pjesëmarrësit në këtë takim kanë bashkëbiseduar me nënkryetarin Sadiku dhe janë shprehur se edhe në të ardhmen do ta mbështesin SBASHK-un në angazhimet për mbrojtjen e të drejtave të anëtarësisë dhe për realizimin e kërkesave legjitime të tyre.
Në pjesën e dytë të takimit është zhvilluar procesi zgjedhor dhe me vota unanime për kryetar të këtij Kuvendi është rizgjedhur Xhavit Rexhaj.