Sindikata e Bashkuar e Arsimit Shkencës dhe Kulturës

Në orët e pasdites në Rahovec u mbajt Kuvendi Zgjedhor i Nivelit Sindikal të Arsimit Parauniversitar, në të cilin morën pjesë:

Kryetari i SBASHK-ut, z. Rrahman Jasharaj,

Sekretari i Përgjithshëm, z. Ymer Ymeri,

Kryetari i Komisionit Statutar të SBASHK-ut, z. Blendor Shatri.

Para fillimit të punimeve të Kuvendit, Kryetari Jasharaj, së bashku me z. Ymer Ymeri, z. Blendor Shatri, Kryetarin e NSKAP-it të Rahovecit, z. Veli Morina, dhe anëtaren e Kryesisë, znj. Xhylsime Sylka, vizituan grupin e trajnimit që po zhvillohej në Rahovec, organizuar nga SBASHK në kuadër të programit “Aplikimi i programeve kompjuterike në mësimdhënie”.

Gjatë vizitës, ata bashkëbiseduan me pjesëmarrësit, i inkurajuan për angazhimin e tyre dhe iu përgjigjën pyetjeve të parashtruara.

Pas kësaj vizite, Kuvendi Zgjedhor u shpall i hapur nga Kryetari i NSKAP-it, z. Veli Morina. Pas miratimit të rendit të ditës, fjalën përshëndetëse e morën Kryetari i SBASHK-ut, z. Rrahman Jasharaj, dhe Sekretari i Përgjithshëm, z. Ymer Ymeri, të cilët përgëzuan strukturat sindikale të Rahovecit për organizimin, unitetin dhe kontributin e tyre të vazhdueshëm në forcimin e sindikatës.

Më pas, Kryetari i Komisionit Statutar, z. Blendor Shatri, informoi të pranishmit për procedurat e parapara statutore që duhej ndjekur gjatë ecurisë së punimeve të Kuvendit.

Pas paraqitjes së raportit të punës dhe raportit financiar për periudhën katërvjeçare, Kuvendi vazhdoi me procesin e votimit për zgjedhjen e Kryetarit të NSKAP-it të Rahovecit.

Në bazë të votimit të fshehtë, nga tre kandidatët e propozuar, me shumicë votash u zgjodh Kryetar z. Mehmet Kryeziu, ndërsa nënkryetare u zgjodh znj. Elife Maxhuni Hoti. Në Kuvend janë zgjedhur edhe anëtarët e Kryesisë, Komisioni Mbikqyrës, delagatët për Kongresin e SBASHK-ut si dhe u propozuen anëtarët për Këshillin Drejtues të SBASHK-ut.

Kuvendi, në frymën e bashkëpunimit dhe respektit për kontributet e deritanishme, propozoi z. Blendor Shatrin si kandidat për Kryetar të SBASHK-ut, ndërsa Kongresit të SBASHK-ut iu propozua që:

z. Rrahman Jasharaj të shpallet Kryetar Nderi i SBASHK-ut, në shenjë mirënjohjeje për kontributin e tij të jashtëzakonshëm shumëvjeçar në udhëheqjen dhe forcimin e sindikatës, dhe që z. Ymer Ymeri të rizgjidhet Sekretar i Përgjithshëm për një mandat të ri.

Punimet e Kuvendit përfunduan me urime për të zgjedhurit dhe me zotimin e strukturave sindikale të Rahovecit për të vazhduar me përkushtim mbrojtjen e të drejtave të punëtorëve të arsimit dhe forcimin e mëtejshëm të SBASHK-ut.