Sindikata e Bashkuar e Arsimit Shkencës dhe Kulturës

22.11.2024

Nisma qytetare për ndryshim-plotësimet në Ligjin për skemat pensionale, e mbështetur nga 20,606 nënshkrime, ka kaluar disa nga procedurat e parapara dhe pritet të rikthehet në Kuvendin e Kosovës për procedura të mëtejshme deri në votimin nga deputetët.

Për të përshpejtuar këto procedura dhe për të kërkuar mbështetjen e subjekteve politike, SBASHK-u ka dërguar ftesa për takime kryetarëve të VV-së, PDK-së, LDK-së dhe AAK-së.

Takimet kanë nisur këtë të premte me pjesëmarrjen e Kryetarit të PDK-së, Memli Krasniqi, dhe shefit të Grupit Parlamentar të kësaj partie, Abelard Tahiri. Ata u takuan me Kryetarin e SBASHK-ut, Rrahman Jasharaj, Sekretarin e Përgjithshëm, Ymer Ymeri, dhe zyrtarin ligjor, Blendor Shatri.

Përfaqësuesit e SBASHK-ut falënderuan përfaqësuesit e PDK-së për përgjigjen e tyre pozitive dhe prezantuan procedurat që ka kaluar nisma qytetare për ndryshimin e Ligjit për skemat pensionale të financuara nga shteti. Ata theksuan se qëllimi është rikthimi i të drejtës që vitet e 90-ta të konsiderohen vite kontributdhënëse, duke përfshirë edhe vitet deri në fillimin e funksionimit të Trustit Pensional.

Përfaqësuesit e SBASHK-ut u shprehën se situata aktuale është e papranueshme, pasi favorizohen ata që kanë qenë lojalë ndaj pushtuesit serb, ndërsa ndëshkohen ata që kanë punuar dhe kontribuar për lirinë dhe shtetësinë e Kosovës.

Kryetari i PDK-së, Memli Krasniqi, dhe shefi i Grupit Parlamentar, Abelard Tahiri, shprehën mbështetjen e tyre për këtë nismë qytetare, duke premtuar angazhim maksimal në Kuvend, duke e cilësuar këtë çështje si një hap të rëndësishëm për njohjen e kontributit të viteve të 90-ta – një periudhë e lavdishme për popullin dhe shtetësinë e Kosovës.

SBASHK shpreson që gjatë javës së ardhshme të zhvillojë takime edhe me kryetarët dhe shefat e grupeve parlamentare të VV-së, LDK-së dhe AAK-së.