Sindikata e Bashkuar e Arsimit Shkencës dhe Kulturës

Sot në zyrat e SBASHK-ut është mbajtur takimi me studentët e Departamentit të Gazetarisë në Universitetin e Prishtinës në kuadër të projektit Media2040.

Learta Beqiri, njëra nga pjesëtaret e këtij projekti, prezantoi para SBASHK-ut vizionin për mediat e së ardhmes. Beqiri, përveç që përmendi sfidat e gazetarisë dhe faktorëve mundësues për krijimin e një të ardhme potenciale, ajo theksoi edhe rëndësinë e edukimit medial në shkolla.

Kërkesa që iu paraqit SBASHK-ut nga studentët dhe udhëheqësit e projektit ishte inkurajimi i mësimdhënësve që lëndën e Edukimit Medial ta propozojnë si lëndë zgjedhore në Drejtorinë Komunale të Arsimit. Kjo kërkesë erdhi si rezultat i gjetjeve që në zbatimin e vizionit për një mjedis medial të rregullt duhet edhe një audiencë e edukuar mediatikisht.

Ndërsa, kryetari i SBASHK-ut, Rrahman Jashari, përgëzoi studentët dhe profesorët për iniciativën e ndërmarrë për vizionin e së ardhmes së mediave.

Gjithashtu, gjatë takimit, kryesuesit e SBASHK-ut shfaqën gatishmëri për ta trajtuar me seriozitet kërkesën e paraqitur nga studentët dhe profesorët.

Pjesë e “Media2040” janë mbi 50 profesorë dhe studentë nga fushat e gazetarisë dhe komunikimit nga Universiteti i Prishtinës, Universiteti i Sarajevës, Universiteti “Luigj Gurakuqi” në Shkodër, Universiteti i Novi Sadit, Universiteti i Malit të Zi dhe Universiteti “St. Cyril and Methodius” nga Shkupi.

Ky projekt mbështetet nga Ambasada e Mbretërisë së Holandës në Prishtinë, përmes projektit Matra.