SBASHK në Konferencën e Parë të projektit evropian “Mësimdhënia Rreth Orës (TAC)”

Sot, SBASHK po përfaqëson mësimdhënësit e Kosovës në një ngjarje të rëndësishme evropiane e cila po mbahet në Romë– Konferencën e Parë të projektit “Mësimdhënia Rreth Orës (TAC)”, organizuar nga ETUCE, ku marrin pjesë sindikata të arsimit nga i gjithë kontinenti.

SBASHK në Romë po përfaqësohet nga Nënkryetarja Vjollca Shala dhe Sekretari i Përgjithshëm Ymer Ymeri, të cilët po kontribuojnë në diskutimet profesionale dhe po paraqesin qartë sfidat, përvojat dhe realitetin e mësimdhënësve tanë.

Çfarë u diskutua në hapjen e konferencës?

Në fillim u prezantua agjenda dhe objektivat e projektit TAC, i cili synon të sjellë një pasqyrë të saktë dhe të bazuar në të dhëna të ngarkesës së vërtetë të punës së mësuesve në Evropë.

U theksua se shumë punë e mësuesve mbetet “e padukshme”, si përgatitja e mësimeve, vlerësimi, komunikimi me prindërit dhe detyra të tjera që tejkalojnë orarin e planifikuar.

Përfaqësues nga vende të ndryshme evropiane – Belgjika, Gjermania, Danimarka, Polonia dhe të tjera – prezantuan gjetje kërkimore mbi:

orarin real të punës së mësuesve,

ndikimin e stresit dhe përgjegjësive shtesë,

diferencat e mëdha ndërmjet vendeve në paga dhe kushte pune,

mungesën e investimeve në arsim,

sfidat e sigurisë profesionale dhe mungesën e mësuesve të kualifikuar.

Këto të dhëna treguan qartë se ngarkesa e tepërt e punës dhe presioni i vazhdueshëm po ndikojnë në shëndetin, motivimin dhe cilësinë e procesit mësimor. U prezantuan gjithashtu studime që tregojnë se stresi i akumuluar i mësuesve ka pasoja të drejtpërdrejta në cilësinë e të nxënit.

Kontributi i SBASHK-ut

Përfaqësuesit tanë po paraqesin me dinjitet sfidat që përjetojnë mësuesit në Kosovë:

- mungesa e investimeve adekuate,

- pagat ende larg standardeve evropiane,

- punët e shumta shtesë jashtë orarit të mësimdhënies,

- nevoja për mbështetje profesionale dhe kushte më të sigurta pune.

Ata po marrin pjesë aktivisht në diskutime dhe po krijojnë ura bashkëpunimi me sindikatat simotra evropiane, duke kontribuar që zëri i arsimit të Kosovës të dëgjohet në tryeza me rëndësi ndërkombëtare.

Pse është i rëndësishëm projekti TAC?

Projekti “Mësimdhënia Rreth Orës” synon që me të dhëna të qarta dhe analiza profesionale:

të influencojë politikat arsimore në Evropë,

të mbrojë dinjitetin profesionit të mësimdhënësit,

të nxisë investime më të mëdha në arsim,

të krijojë kushte më të qëndrueshme dhe pagë dinjitoze,

të rrisë cilësinë e arsimit në tërësi.

Mesazhi i SBASHK-ut

SBASHK do të vazhdojë të jetë pjesë aktive e dialogut social evropian dhe të mbrojë të drejtat e punëtorëve të arsimit në çdo nivel. Ne besojmë se një arsim cilësor ndërtohet me mësues të vlerësuar, të respektuar dhe të mbështetur.

Faleminderit të gjithë kolegëve dhe partnerëve evropianë për bashkëpunimin dhe angazhimin e tyre të përbashkët për një të ardhme më të mirë të arsimit.