Respekt për angazhimet e SBASHK-ut në Universitetin "Ukshin Hoti"
Prishtinë, 29.11.2017
Pasi me kohë janë kryer zgjedhjet nëpër njësitë akademike të UP-së dhe Universiteteve tjera të Kosovës me sukses po realizohen edhe zgjedhjet në Kuvendet sindikale të këtyre institucioneve të arsimit të lartë superior. Pas Kuvendit zgjedhor në Universitetin Isa Boletini " të Mitrovicës dhe atë të Prishtinës "Hasan Prishtina", është mbajtur një aktivitet i tillë sindikal edhe në Universitetin "Ukshin Hoti" të Prizrenit. Në hapje të këtij Kuvendi zgjedhor, kryetari i SUSHK-ut, Bardh bardhi bashkë me sekretarin prof. Dr. Elez Krasniqi kanë përshëndetur pjesëmarrësit në emrin e tyre dhe të kryetarit të SBASHK-ut. Pas kësaj ata kanë shpalosur edhe momente nga arritjet e shumta të SBASHK-ut duke mos harruar edhe sfidat dhe angazhimet që duhet bërë në shërbim të anëtarësisë.
Në pjesën e dytë të këtij takimi është filluar me procesin zgjedhor në një garë të fortë mes kandidatëve për çdo funksion sindikal në këtë Universitet që mbanë emrin e një njeriu të madh të kombit tonë.
Anëtarët e këtij Kuvendi me votën e tyre të fshehtë kanë vendosur që kryetar i Kuvendit të këtij institucioni të arsimit të lartë e superior të zgjidhet Përparim Avdullahu, nënkryetar Blerim Shehu dhe Blerta Hajra, Shaban Bajrami e Xhevat Kallaba anëtarë të kryesisë. Kryesia dhe gjithë anëtarët e SBASHK-ut në këtë Universitet janë zotuar se do ta ruajnë atmosferën e mirë dhe unitetin sindikal dhe do të japin kontributin e tyre në angazhimet për realizimin e kresave të anëtarësisë, jo vetëm të këtij institucioni arsimor, por edhe të kolegëve sindikalistë kudo në Kosovë.